Mat 24 | BOJ | STEP | Yesus a na naŋgi anjam degsi minjrsiq koboonaqa atra tal koba uratosiq gileqnaqa aqa aŋgro naŋgi na aqa areq bosib osoryeb.

Matthew 24

Mondoŋ jeu tamo naŋgi na atra tal niñaqyqab

1 Yesus a na naŋgi anjam degsi minjrsiq koboonaqa atra tal koba uratosiq gileqnaqa aqa aŋgro naŋgi na aqa areq bosib osoryeb. 2 Onaqa Yesus na minjrej, “Niŋgi quiye. E bole merŋgwai. Atra tal niŋgi unonub endi bunuqna jeu tamo naŋgi na bosib tulaŋ niñaqyosib aqa meniŋ kalil paraparainjrsibqa taqal breinjrqab. Yimqa meniŋ bei meniŋ bei aqa quraq di sqasai. Meniŋ kalil segi segiqab.”

Diŋo batiamqa gulube kokba branteleŋqas. Yesus a deqa anjam marej

3 Yesus a na naŋgi degsi minjrsiqa Oliv manaq oqsiq goge di awesonaqa aqa aŋgro naŋgi aqa areq bosibqa lumu nenemyeb, “Ni iga merge. Bati gembu jeu tamo naŋgi bosib atra tal niñaqyqab? Mandam endi koboqa laqnim ni olo mandamq aioqnim kumbra kie namoqna bamqa iga unsim poigwas?”

4 Onaqa Yesus na kamba minjrej, “Niŋgi geregere ŋam atsib soqniye. Tamo qudei naŋgi na niŋgi gisaŋgo uge. 5 Bunuqna gisa gisaŋ tamo gargekoba naŋgi ijo ñam na boqnsib tamo uŋgasari naŋgi minjroqnqab, ‘E Kristus.’ Degsib tamo uŋgasari tulaŋ gargekoba naŋgi gisaŋnjroqnqab. 6 Ariya diŋo bati jojomoqnimqa niŋgi anjam endegsib quoqnqab, ‘Sawa bei beiq dia naŋgi aŋ na qotokobaiyeqnub.’ Ariya niŋgi anjam di qusibqa niŋgi deqa tulaŋ prugaib. Qotei a nami marej, ‘Kumbra di brantqas.’ Deqa branteme. Ariya kumbra di brantimqa diŋo bati urur brantqasai. Soboleiyosim brantqas. 7 Bati deqa sawa bei ti sawa bei ti qoto tigeloqnsibqa segi segi qoto itnjroqnqab. Mandor kokba qudei naŋgi dego qoto tigeloqnsibqa mandor kokba qudei naŋgi qoto itnjroqnqab. Sawa bei beiq dia mimiŋ kokba ti mam ti iŋgi saio bati dego branteleŋqas. 8 Kumbra kalil di uŋa aŋgrotqa osiqa mati jaqatiŋ kiñala eqnu dego kere.

9 “Bati deqa naŋgi na niŋgi ojsib jaqatiŋ ti gulube ti eŋgwab. Osib niŋgi luŋgsib moiotŋgwab. Niŋgi ijo ñam ejunub deqa tamo uŋgasari kalil naŋgi niŋgi qa are tulaŋ ugeinjroqnqas. 10 Bati deqa tamo uŋgasari gargekoba e qa naŋgo areqalo siŋgilato qaji naŋgi ijo ñam ulontosib naŋgi segi segi jeu sosibqa naŋgo segi was naŋgi ojeleŋoqnsib tamo uge naŋgo baŋq di atoqnqab. 11 Gisaŋ tamo tulaŋ gargekoba naŋgi dego boqnsib tamo uŋgasari naŋgi endegsib minjroqnqab, ‘E Qotei aqa medabu o qaji tamo bole.’ Degsib naŋgi gisaŋnjroqnqab. 12 Kumbra uge deqaji tulaŋ kobaoqnimqa tamo gargekoba naŋgi qalaqalaiyo kumbra uratqab. 13 Ariya tamo uŋgasari naŋgi ijo ñam siŋgila na ojsib gilsi gilsib diŋo bati itqab di Qotei a naŋgi oqas. 14 Yim naŋgi sawa sawa kalil keretoqnsib Qotei a tamo uŋgasari naŋgo Mandor Koba sosiq naŋgi taqatnjreqnu anjam bole di mare mare laqnib tamo uŋgasari kalil naŋgi quoqnqab. Ariya bunuqna diŋo bati brantqas.”

Gulube tulaŋ kokba branteleŋqas

15 Osiqa Yesus a olo anjam endegsi minjrej, “Iŋgi tulaŋ ugedamu Qotei aqa medabu o qaji tamo Daniel a nami deqa marej qaji di niŋgi unqab. Iŋgi ugedamu di a Qotei aqa getento tal miligiq di tigelqas.” E Matyu. Tamo a ijo anjam endi sisiyeqnu qaji a geregere sisiyosim poiyem. 16 “Niŋgi iŋgi ugedamu di unsibqa bati deqa tamo uŋgasari Judia sawaq di unub qaji naŋgi jaraiosib manaq oqoqujatebe. 17 Tamo naŋgi tal meq di unub qaji naŋgi jaraiqa oqnsib iŋgi iŋgi oqa osibqa olo warum miligiq gilaib. Naŋgi jaraioqujatebe. 18 Tamo naŋgi wauq di unub qaji naŋgi jaraiqa oqnsib naŋgo gara jugo oqa osibqa olo puluosib qureq baib. Naŋgi dena torei jaraioqujatebe. 19 Bati deqa uŋa gumaŋ ti unub qaji naŋgi jaraio baŋgioqnsib gulube koba oqab. Uŋa aŋgro mom ti naŋgi dego jaraio baŋgioqnsib gulube koba oqab. 20 Deqa niŋgi endegsib Qotei pailyoqniye, ‘Gulube di awa bati qa brantaiq. Yori bati qa dego brantaiq.’ 21 Bati deqa tamo uŋgasari naŋgi gulube tulaŋ kobaquja oqab. Gulube deqaji nami brantosaioqnej. Qotei na mandam atej bati deqa gulube deqaji brantosai dena bosi bosiq agi bini unum. Bunuqna laŋa ambleq di dego brantqasai. Agi bati qujai deqa brantqas. 22 Gulube di aqa bati Qotei a na truqutqas. A na truqutqasai di tamo uŋgasari kalil naŋgi padalekritqab. Aqa segi tamo uŋgasari nami giltnjrej qaji naŋgi padalaib deqa a na gulube di aqa bati truqutqas.

23 “Bati deqa tamo bei na niŋgi gisaŋgosim merŋgwas, ‘Niŋgi uniye. Kristus bqo agiende,’ o ‘Kristus bqo agide.’ Degsim merŋgimqa niŋgi aqa anjam quetaib. 24 Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

25 “Niŋgi quiye. Kumbra kalil di brantosaisonaqa agi e namoqna merŋgonum. 26 Deqa tamo qudei naŋgi na niŋgi endegsib merŋgwab, ‘Niŋgi uniye. Kristus bqo agi wadau sawaq di unu.’ Degsib merŋgibqa niŋgi naŋgo anjam di dauryosib wadau sawaq gilaib. Ariya tamo qudei naŋgi na niŋgi merŋgwab, ‘Kristus bqo agi talq di unu.’ Degsib merŋgibqa niŋgi naŋgo anjam quetnjraib. 27 Niŋgi qalie, kola minjaleqnaqa laŋ kalil suwaŋeqnu. Dego kere e Tamo Aŋgro laŋ qureq dena boqnitqa tamo uŋgasari kalil naŋgi e nubqab.

28 “Tamo naŋgi qusaonub qaji sawa dia qal naŋgi koroqab.”

Tamo Aŋgro a siŋgila ti riaŋ ti mandamq aiqas

29 Osiqa Yesus a olo anjam endegsi minjrej, “Gulube kalil di naŋgo bati koboamqa seŋ ambruqas. Bai dego suwaŋqasai. Bongar naŋgi laŋ goge dena ululoŋosib mandamq aiqab. Laŋ goge dia iŋgi iŋgi kalil reŋgiŋyeleŋqab. 30 Bati deqa e Tamo Aŋgro bqai. Ijo toqor a laŋ goge dia brantimqa tamo uŋgasari sawa sawa kalilq di unub qaji naŋgi e qa akamugetqab. E Tamo Aŋgro siŋgila ti riaŋ ti laŋbiq na boqnit tamo uŋgasari kalil naŋgi e nubqab. 31 Yimqa e siŋgila na gul anjamosiy ijo laŋ aŋgro naŋgi qariŋnjritqa naŋgi sawa sawa kalil keretosib Qotei aqa segi tamo uŋgasari nami giltnjrej qaji naŋgi laŋ utru utruq dena koroinjrqab.”

Qayu qa yawo anjam dena niŋgi poiŋgwas, diŋo bati jojomqo

32 Osiqa Yesus a olo anjam endegsi minjrej, “E na qayu qa yawo anjam niŋgi merŋgitqa dena poiŋgwas. Qayu baŋga qalsim olo ñalguyoqnimqa niŋgi unsib qalieqab, seŋ aqa bati jojomqo. 33 Dego kere kumbra kalil e na merŋgonum qaji endi brantimqa niŋgi unsibqa endegsib qalieoiye, ‘Bole, Kristus bqajqa bati jojomqo. A siraŋmeq di tigelejunu.’ 34 Niŋgi quiye. E bole merŋgwai. Tamo uŋgasari bini bati endeqa unub qaji naŋgi kalil moreŋosaisoqnibqa kumbra kalil e na merŋgonum qaji endi branteleŋqas. 35 Laŋ ti mandam ti koboqab. Ariya ijo anjam koboqa keresai.”

Yesus aqa bqajqa bati tamo qujai bei qaliesai

36 Osiqa Yesus a olo anjam endegsi minjrej, “Ijo bqajqa bati tamo qujai bei qaliesai. Laŋ aŋgro naŋgi qaliesai. E Qotei aqa Ŋiri e segi dego qaliesai. Ijo Abu a segi qalie. 37 Noa aqa bati qa tamo uŋgasari naŋgi kumbra yoqneb dego kere e Tamo Aŋgro bqajqa bati qa naŋgi kumbra degyoqnqab. 38 Agi Noa aqa bati qa mandam ya maqosaisonaqa tamo naŋgi iŋgi uyoqnsib ya uyoqnsib uŋa baŋ ojeleŋoqnsib sonabqa Noa a qobuŋ miligiq gilej. 39 Mandam ya maqosim naŋgi padaltnjrqajqa di naŋgi qaliesai. Naŋgi laŋa nanari sonabqa mandam ya maqosiq naŋgi kalil padaltnjrej. Dego kere e Tamo Aŋgro bqajqa bati qa tamo uŋgasari naŋgi nanari degsib sqab. 40 Tamo aiyel wau qujaiq dia iŋgi yagoqnibqa Qotei na bei laŋ qureq osi oqsimqa bei uratim sqas. 41 Uŋa aiyel tal qujaiq dia saplaŋ gereiyoqnibqa Qotei na bei laŋ qureq osi oqsimqa bei uratim sqas. Deqa niŋgi geregere ŋam atiye. 42 E nuŋgo Tamo Koba. E bati gembu bqajqa di niŋgi qaliesai. 43 Niŋgi are qaliye. Bati gembu bajiŋ tamo bosim tal paratqas di tal lanja a qalieqasai. A nami qalieosiq qamu a ŋam atsiq sonaq qamu bajiŋ tamo bosiq tal paratqa yonaq unsiq wiyej qamu. 44 Dego kere e Tamo Aŋgro ijo bqajqa bati niŋgi qaliesai. E bosiy niŋgi pruqtŋgaim deqa niŋgi geregere ŋam atsib e qa tariŋosib soqniye.”

Wau tamo bole ti wau tamo uge ti naŋgi deqa Yesus a yawo anjam marej

45 Osiqa Yesus a olo anjam endegsi minjrej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na endegsi minjqas, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’ 46 Tamo di a wau tamo bole. Deqa tal lanja na a degsi minjsimqa sawa beiq gilsim di sqas. Olo puluosim bosim wau kalil a na aqa wau tamo nami yej qaji di kalil keretsi soqnimqa a bosi unimqa wau tamo di a tulaŋ areboleboleiyqas. 47 Deqa niŋgi quiye. E bole merŋgwai. Wau tamo di a wau bole yej deqa tal lanja na aqa iŋgi iŋgi kalil osim aqa baŋq di atim a na taqatoqnqas. 48 Ariya wau tamo di a tamo uge qamu a endegsi are qalqas, ‘Ijo tamo koba a urur bqasai.’ 49 Degsi are qalsimqa tamo naŋgi koba na wauo qaji naŋgi laŋa laŋa kumbaiŋnjroqnqas. Osim wain uyo tamo qudei naŋgi joqsim koba na iŋgi ti wain ti uyoqnsibqa nanarioqnqab. 50 Aqa tamo koba bqajqa bati a qaliesai. Deqa a kumbra degsim soqnimqa aqa tamo koba brantoqujatosim unimqa a tulaŋ prugugetqas. 51 Deqa aqa tamo koba a na wau tamo di ugeugeiyosim qalsim gisaŋ tamo naŋgo so sawaq waiyim aiqas. Sawa dia tamo naŋgi tulaŋ akamkobayoqnsib pailoqnsib naŋgo jaqatiŋ qa qalagei anjam atoqnqas.”